[15:42]
Forsætisráðherra (Davíð Oddsson) :
Hæstv. forseti. Hv. 14. þm. Reykv. hefur borið hér fram fyrirspurn sem hún hefur gert grein fyrir og lýst aðdraganda þessa máls sem er auðvitað réttur í öllum meginatriðum að því undanskildu að ég var ekki út af fyrir sig að lofa einu eða neinu á þessu augnabliki. Ég var að vitna til yfirlýsingar sem gefin var 19. maí sl. í tengslum við endurmat á stöðu kjaramála í landinu og þar kom fram að nauðsynlegt væri að um aðgerð af þessu tagi næðist víðtæk sátt, ekki síst aðila á vinnumarkaði. Það urðu mér því vonbrigði að sú hugmynd sem ég setti fram fékk töluverða andspyrnu þegar hún var kynnt.
Nú hefur hins vegar tekist sátt í málinu milli allra þessara aðila. Ég átti fund í morgun með forseta Alþýðusambandsins og embættismönnum hans og framkvæmdastjóra Vinnuveitendasambandsins og sérfræðingum hans þar sem var farið yfir málið á nýjan leik. Málið hefur breyst að því leyti til að menn eru að tala um að taka áfanga sem ekki nær til tíu ára heldur til fimm ára og þá eru menn að tala um fjárhæð á fimm ára tímabili sem mundi kannski framkvæmast á þremur og hálfu ári eða svo þar sem væru 3,5
milljarðar kr. Þessir 3,5 milljarðar kr., sem væri sérstök fjárveiting til vegagerðar, mundu skiptast því sem næst í hlutfalli við íbúafjölda viðkomandi kjördæma. Það mundi þýða að í hlut höfuðborgarsvæðisins þar sem að mínu mati er nú þörfin brýnust, kæmu um 60% sem mundu vera 400 millj. miðað við heilt ár til þess svæðis. Til viðbótar mundi verða á öðrum vegum til þjóðvega væntanlega nálægt 300 millj. kr. þannig að það væri um að ræða þá 700 millj. rúmar sem kæmu til þessara framkvæmda. Ég gerði borgarstjóranum í Reykjavík í símtali grein fyrir þessum atriðum í morgun og ég vænti þess að borgarstjórinn hafi gert bæjarstjórum á bæjarstjórafundi í dag grein fyrir þessum hugmyndum.
Það sem leiddi til sáttar í málinu milli þessara aðila þannig að þeir hafa báðir lýst yfir fullum stuðningi við þessa aðgerð nú er það að ekki er tekið jafnstórt skref og ég hafði rætt um sem uppfyllir þau sjónarmið Vinnuveitendasambandsins að menn eigi ekki að ganga ,,glannalega`` fram í málinu. Á hinn bóginn hvað snertir þau sjónarmið sem hv. þm. réttilega vitnaði í af hálfu forseta Alþýðusambandsins og hans samtaka þá er gert ráð fyrir því að tekjuauki af þessu tilefni nái aðeins til helmings útgjaldanna þannig að framfærsluvísitala hækki minna en ella en annað verði sett sem sérstakt framlag árlega frá ríkissjóði.
Ef þessi verður niðurstaðan, sem sátt er um milli mín og þessara aðila og ég vona að fái framgang í þinginu mundi, við lauslega áætlun, gjaldtakan vegna þessara framkvæmda þýða 0,13% hækkun framfærsluvísitölu og 0,04% hækkun lánskjaravísitölu sem þessir aðilar, aðilar á vinnumarkaðinum, telja innan þeirra marka sem ásættanleg séu og lýsa þess vegna yfir fullum stuðningi við þessa aðgerð.
Ég vil þó taka fram að það er ljóst að þarfirnar á höfuðborgarsvæðinu eru mun meiri heldur en þessar, en engu að síður er ljóst að þessi fjárhæð mun gjörbreyta stöðunni hér og jafnframt mun það sem kemur í hlut annarra verkefna um landið hafa þýðingarmikil áhrif á ýmsar framkvæmdir þar. Með þessu er gert ráð fyrir því að þessu fjármagni verði skipt með öðrum hætti en tíðkast við gerð vegáætlunar þannig að hér verði þessi fjárhæð nær samhengi við bensíneyðsluna á viðkomandi svæðum. Það er að vísu ekki fundið út með því að setja bensíngjald eyrnamarkað við sölu heldur miðað við íbúafjölda á viðkomandi svæðum. Ég vænti þess að þetta muni hafa mikla þýðingu fyrir höfuðborgarsvæðið, fyrir höfuðborgina sérstaklega og reyndar svæðin hér í heild, og tel mig þá hafa, hæstv. forseti, svarað fyrirspurn hv. þm. vonandi fyllilega.