[11:58]
Fjármálaráðherra (Friðrik Sophusson) (andsvar) :
Virðulegur forseti. Jafnvel þótt tekjur sjúkraliða komi þessu máli sáralítið við þá er það kannski athyglisvert þegar ASÍ er að tala um lágu tekjurnar þá nefnir ASÍ alltaf 50 þús. og 60 þús., það er ekkert gert fyrir þetta fólk. Það kom fram í blaði um daginn hverjar eru meðaltekjur sjúkraliða. Á Landspítalanum, þar sem launin eru nú ekki há ef marka má ræðu hv. þm., eru heildarlaun þeirra 108 þús. kr. á mánuði. Þetta er meðaltalið, 108 þús. kr. á mánuði. Ég er ekki að segja að þetta sé hátt en menn eiga að nota réttar tölur.
Og varðandi hátekjuskattinn skal það tekið fram að aðeins sú breyting sem við erum að gera núna með því að hækka mörkin úr 200 í 225 þús. gerir það að verkum að þriðjungur einhleypra fer undir mörkin og 60% af þeim sem detta út er fólk undir 40 ára. Það er einmitt það fólk sem við erum að tala um. Það er nefnilega margt af þessu fólki sem skreið yfir þessi mörk. Bara sú breyting sem hér er gerð kemur til móts við þetta fólk sem er að berjast við að koma þaki yfir höfuðið og við höfum stundum verið að nefna.
Það má ekki heldur gleyma því, virðulegur forseti, þegar minnst er á íslenska skattkerfið að jaðaráhrifin eru orðin ansi mikil og þegar hátekjuskatturinn kemur til viðbótar þá mega menn ekki gleyma því að þetta fólk sem hefur tiltölulega háar tekjur hér á landi fær ekki vaxtabætur, það fær ekki barnabótaauka, það missir bótaréttinn. Þegar talað er um heildaráhrifin, bætur og skatta, þá geta jaðaráhrifin verið kannski 70% eða þar um bil. Þetta verða menn að hafa í huga þegar þeir ræða um kjarajöfnun og íslenska skattkerfið. Og ég ætla að endurtaka það enn einu sinni að í íslenska skattkerfinu felst mjög mikil kjarajöfnun.