[16:37]
Fjármálaráðherra (Friðrik Sophusson) :
Virðulegi forseti. Fyrst vil ég víkja að því sem sagt var um launahækkanir hjá hinu opinbera. Í því sambandi vil ég nefna tvennt: Eins og flestum er kunnugt þá hækka laun þeirra lægstu, allægstu hópanna, ef um er að ræða námskeið. Þetta hefur verið lengi í kjarasamningum og eitthvað mun hafa verið um þetta að undanförnu. Hins vegar er ljóst að það er skylda samkvæmt kjarasamningum að taka kjarasamninga til endurskoðunar ef um er að ræða breytingar á verkefnum starfsmanna og það er þekkt í a.m.k. einni stofnun sem ég veit um að slíkt gerðist nú fyrir skömmu. Þetta gerist þá með svokallaðri samstarfsnefnd sem ég veit að hv. þm. þekkir.
Það er röng staðhæfing sem kemur fram aftur og aftur hjá hv. þm. að tala um 15% launahækkanir hjá hjúkrunarfræðingum og svarið liggur fyrir. Það var svar við fyrirspurn þingmannsins og það er allt annað en þetta sem kemur fram í því svari. Kostnaðarhækkun ríkisins vegna kjarasamningsins miðað við þann kostnað sem var áður en samningurinn gekk í gildi er líklega um 6,5% eða þar um bil.
Verkfall sjúkraliða hefur nú staðið frá 11. nóv. Áður en verkfallið hóst voru haldnir fjölmargir samningafundir. Upphafleg kröfugerð félagsins var afar óskýr og sá rökstuðningur sem fylgdi henni óljós. Eftir rúmlega tveggja vikna verkfall lagði félagið fram kröfur sem hægt er að leggja mat á og fólu þær í sér um það bil 20% hækkun launa og hefur félagið ekki slegið af þeim kröfum síðan.
Samninganefnd ríkisins lagði fram tilboð áður en verkfallið hófst. Það fól í sér breytingar á launum og ýmsum atriðum sem rædd höfðu verið. Umræður um það tilboð leiddu ekki til niðurstöðu. Hinn 9. des. lagði samninganefnd ríkisins og Reykjavíkurborgar og fleiri aðila fram tillögur til lausnar á deilunni. Sú tillaga byggðist á þeirri kröfu Sjúkraliðafélags Íslands að félagið fengi launabreytingar í samræmi við breytingar á launum annarra heilbrigðisstarfsmanna. Tillagan var lögð fram að undangengnum viðræðum við borgarstjórann í Reykjavík og miðaðist m.a. við þau viðhorf sem fram komu í þeim viðræðum og í bréfi borgarstjórans til fjmrh. Þessi tillaga var lögð fram í fullu samráði og með stuðningi borgarstjórans í Reykjavík og samin af báðum samninganefndunum.
Meginatriðin í þessari tillögu eru þau að með samningi verði fest öll atriði kjarasamnings sem til umfjöllunar höfðu verið og niðurstaða hafði náðst um í aðalatriðum, svo sem innbyrðis röð í launaflokka, endurmenntun og námsskeið sjúkraliða utan Reykjavíkur og fleira. Launaliðir samningsins yrði hins vegar settir í hendur nefndar fulltrúa sem aðilar skipuðu ásamt óháðum oddamanni. Nefndin átti að bera saman launaþróun sjúkraliða og annarra heilbrigðisstarfsmanna á tilteknu tímabili og ákveða breytingu á launatöflu sjúkraliða ef í ljós kæmi að þeir hefðu dregist aftur úr.
Í framhaldi af tillögu SNR hafa þau efnisatriði sem snúa að öðru en launalið verið rædd og gengið frá breytingum þannig að ekkert er því til fyrirstöðu að taka afstöðu til samningsins og ganga frá honum. Á fundi í dag lagði samninganefnd ríkisins enn fram tillögur um viðræður um tiltekin efnisatriði sem Sjúkraliðafélag Íslands hafði gert athugasemdir við og ítrekaði óskir um svar við tillögum sínum. Ég vænti þess að svar komi frá Sjúkraliðafélagi Íslands á morgun.
Ég tel þannig, virðulegi forseti, að samninganefnd ríkisins hafi gert sitt til þess að leysa þessa deilu. Deilan verður hins vegar ekki leyst í sölum Alþingis eins og ég veit að hv. þm. og aðrir skilja og kannski allra helst sá maður sem sat í stóli fjmrh. á undan mér og stóð oft í stappi við ýmsar launastéttir landsins sem m.a. endaði í því að sett voru lög, bráðabirgðalög, á gerða samninga. Ég veit að slíkur maður með slíka reynslu skilur það betur en nokkur annar.