[prenta uppsett í dálka] 85. fundur
[14:18]
Margrét Frímannsdóttir:
Virðulegi forseti. Ég vil fyrir það fyrsta þakka hv. fyrirspyrjanda fyrir að vekja athygli á aðgengi fatlaðra eða möguleikum fatlaðra til að njóta sýninga í Þjóðleikhúsinu. Jafnframt fannst mér svör hæstv. ráðherra afar léleg. Það er í sjálfu sér ekkert til að hrósa sér af þó að það séu einhverjir möguleikar fyrir átta fatlaða einstaklinga í hjólastól að komast að við sýningu í Þjóðleikhúsinu. Ég vil bara minna á að í gegnum tíðina hefur uppbygging á allra handa húsnæði fyrir félags- og tómstundastarf verið með þátttöku hins opinbera, ýmist ríkis eða sveitarfélaga eða hvoru tveggja. Og í langflestum tilvikum er því þannig háttað að fatlaðir geta ekki notið menningarstarfs til jafns á við aðra. Ég hefði gjarnan viljað heyra það að hæstv. menntmrh. setti sér ákveðið markmið og skýrði frá því hvernig þau eru.
