[prenta uppsett í dálka] 88. fundur
[15:16]
Ásta R. Jóhannesdóttir:
Herra forseti. Mig langar til að beina spurningu til hæstv. menntmrh. um málefni fréttastofu sjónvarps. Í lögum um Ríkisútvarpið, nr. 68/1985, segir, með leyfi forseta:
,,Ríkisútvarpið skal m. a. veita almenna fréttaþjónustu og vera vettvangur fyrir mismunandi skoðanir á þeim málum sem efst eru á baugi hverju sinni eða almenning varða.``
Þetta er í 15. gr. Og síðar í sömu grein:
,,Það skal veita almenna fræðslu og gera sjálfstæða dagskrárþætti sem snerta Ísland og Íslendinga sérstaklega.
Útvarpsefni skal miðað við fjölbreytni íslensks þjóðlífs.``
Nú hefur verið þrengt svo að fréttastofu sjónvarps að hún heldur rétt úti lágmarksfréttaþjónustu. Ekki eru lengur á dagskrá þættir um þingmál, svo sem Þingsjá, umræðuþættir á vegum fréttastofu hafa verið fáir ef nokkrir, Kastljós hefur verið lagt af og fréttaskýringar eru nánast engar. Dagskrárgerð á vegum fréttastofu hefur nánast verið aflögð. Síðan er á döfinni að leggja niður starf fréttamanns í Kaupmannahöfn eða á Norðurlöndum. Því spyr ég hæstv. menntmrh. hvort hann telji að fréttastofa sjónvarps standi undir þeim kröfum sem gerðar eru til hennar í lögum þegar svona er þrengt að henni fjárhagslega.
