[15:20]
Ásta R. Jóhannesdóttir (andsvar):
Herra forseti. Það er gott að fá það staðfest að það er vilji Framsfl. að skera mest niður á höfuðborgarsvæðinu. Það er staðfest af orðum hæstv. samgrh. að það sé vilji Framsfl. að skera mest niður hér á höfuðborgarsvæðinu þar sem helmingur fylgis Framsfl. er og eins og kom fram hjá hv. þm. Siv Friðleifsdóttur. Við skulum halda þessu til haga.
Það kom fram í máli mínu áðan að 18% niðurskurður er á landsvísu á vegafé og auðvitað er það bagalegt þar sem þarf að skera niður. En langerfiðasti niðurskurðinn lendir á Reykjavík og höfuðborgarsvæðinu. 37% niðurskurður meðan það er 18% á landsvísu og það er alvarlegt, hæstv. samgrh. Það er alvarlegt. Norðurl. e. og höfuðborgarsvæðið fara verst út úr þessum niðurskurði á framkvæmdafé sem er eftir höfðatölu.
Ég fagna því að hæstv. ráðherra hafi fé til að leggja í Akureyrarflugvöll og mig langar að spyrja hvort eitthvað af því viðbótarfé fari til höfuðborgarsvæðisins.