Frsm. utanrmn. (Geir H. Haarde):
Herra forseti. Ég mæli fyrir nefndaráliti utanrmn. um till. til þál. um fullgildingu fríverslunarsamnings milli EFTA-ríkjanna og Slóveníu.
Nefndin hefur fjallað um málið á tveimur fundum bæði fyrir framlagningu þess og eftir að það var formlega komið til meðferðar á vettvangi Alþingis. Nefndin fékk á sinn fund utanrrh. og fulltrúa utanrrn. og kynnti sér innihald málsins. Hér er um að ræða fríverslunarsamning í takt við þá samninga sem gerðir hafa verið á vegum EFTA undanfarin ár við hin ýmsu ríki í Mið- og Austur-Evrópu.
Nefndin fagnar því að unnt skuli hafa verið að gera slíkan samning við Slóveníu og leggur til að tillagan verði samþykkt óbreytt.