Magnús Stefánsson (andsvar):
Virðulegur forseti. Ég þakka hv. þm. Össuri fyrir hlýjan hug í minn garð og ætla að gefa mér góð ráð. (ÖS: Og annarra framsóknarmanna.) Já, ég þakka fyrir það. Það er alltaf góður hugur sem fylgir slíku. En hvað varðar sölu Pósts og síma hf. koma fram ákvæði um þau mál í frv. Það er m.a. að frumkvæði okkar framsóknarmanna að þar er skýrt kveðið á um það að það sé Alþingi sem ákveði ef á að selja hlut í fyrirtækinu. Ég tel að ákvæði um þetta efni geti varla verið miklu skýrara og það sýnir m.a. vilja og hug framsóknarmanna í málinu. Ég held að ég geti ekki svarað þessu öðruvísi.
Ég ætla hins vegar ekki að fara út í það að ræða reynsluheim hv. þm. af samstarfi við hæstv. samgrh.