Ásta R. Jóhannesdóttir (andsvar):
Herra forseti. Varðandi athugasemdir hæstv. ráðherra er rétt metið hjá honum að ég tók undir skoðun Hreins Loftssonar sem kom fram í Tímanum á laugardaginn. (Gripið fram í.) Nú, það er líklega einnig í BSRB-blaðinu, ég vissi það ekki. En ég tek undir það að ég tel að það þurfi að skipta þessu upp og tók undir það með honum. Aftur á móti sé ég ekki hvað ætti að vera erfiðara hér á landi að skipta þessu fyrirtæki í póststofnun og símamálastofnun þar sem það hefur verið gert á Norðurlöndum og víðast í Evrópu og menn hafa alveg getað tekist á við það þar. Ég sé því ekki að við getum ekki tekist á við þetta.
Aftur á móti eru margar aðrar spurningar sem hæstv. ráðherra hefur ekki svarað enn þá en verða að bíða betri tíma síðar í umræðunni.