Ágúst Einarsson:
Herra forseti. Ég vil þakka fyrirspyrjanda og hæstv. ráðherra fyrir svörin. Það er ljóst af þessu að fjárfestingar útlendinga hérlendis eru nær engar. Ég minni á að fjárfestingar alls árið 1995 á Íslandi voru 70 milljarðar. Við erum að tala um 400 millj. Þetta er ekkert sem skiptir máli og það á að vera okkur umhugsunarefni að ekki hefur tekist að laða erlenda fjárfestingu hingað eins og nauðsynlegt er. Í ljósi sífellt aukinna alþjóðaviðskipta og þess að fjárfestingar milli landa verða sífellt algengari í efnahagsstefnu einstakra ríkja, eigum við að nota þetta tilefni sem fyrirspurnin gefur til að kanna betur hvernig þróunin hefur verið í nágrannalöndunum á síðustu árum og hvernig við getum breytt okkar löggjöf til að fá meiri erlendar fjárfestingar. Uppistaðan í erlendum fjárfestingum okkar hér eru í einni atvinnugrein sem er áliðnaður eða stóriðja. Það er kannski ekki mjög vænleg stefna til framtíðar að vera með öll okkar egg í þessari einu körfu. Þetta þarf að vera miklu fjölþættara og þetta er liður í þeirri breytingu sem er að verða á efnahagsumhverfi alls staðar í kringum okkur. Og við eigum að taka þátt í því með opnum huga.