Ísólfur Gylfi Pálmason:
Herra forseti. Í þessari umræðu hefur komið fram örlítið kjördæmapot en af alkunnu lítillæti langar mig til að vekja athygli á því að á Hvolsvelli er lítill flugvöllur, öllu heldur lendingarstaður, sem var byggður af flugáhugamönnum og samkvæmt þessari till. til þál. um flugmálaáætlun áranna 1996--1999 virðist standa til að leggja þennan litla lendingarstað niður. Þessu hafa sveitarstjórnarmenn í Rangárþingi mótmælt og ég tek heils hugar undir þau mótmæli.
Þessi lendingarstaður er hlekkur í ört vaxandi ferðamannaþjónustu í Rangárþingi. Það er algengt að flugáhugamenn komi fljúgandi og lendi á Hvolsvelli, stundi t.d. veiðar í Rangánum, heimsæki söguslóðir Njálu, leiki golf á Strandarvelli eða njóti náttúrufegurðar Rangárþings. Einnig er þessi litli lendingarstaður hluti af samskiptamynstri Vestmanneyinga og Rangæinga vegna þess að þess eru dæmi að fyrirtæki í Vestmannaeyjum og Hvolsvelli eigi samvinnu í sambandi við ferðamennsku.
Herra forseti. Ég leyfi mér því að mótmæla þessari ákvörðun og skora á hæstv. ráðherra að endurskoða þessa ákvörðun.