Jón Kristjánsson (andsvar):
Herra forseti. Ég hef kannski gert mistök í því að vera svona heldur nálægt nútímanum en hv. 4. þm. Vestf. er hugstætt að flokkurinn á 80 ára afmæli í dag og hverfur 60--80 ára aftur í tímann. Ég hef lesið þessa sögu og það er alveg rétt að áherslurnar á þeim tíma voru aðrar en í dag. Ég var að tala um þær áherslur sem við, núlifandi stjórnmálamenn, höfum lagt. En ég svara ekki fyrir þá sem voru í forsvari fyrir 70--80 árum. Það dettur mér ekki í hug.
Varðandi veiðileyfagjaldið vil ég segja það að hv. 4. þm. Vestf. getur gengið inn í hús án þess að hafa nokkur tæki í höndunum en til þess að veiða þarf hann að hafa skip.