[prenta uppsett í dálka] 108. fundur
Árni M. Mathiesen:
Herra forseti. Ég vil fagna framlagningu þessa máls. Ég tel að það sé vel úr garði gert og að í frv. sé gætt nokkuð góðs innra jafnvægis. Mér finnst þetta frv. einnig rökrétt framhald af samþykkt stjórnsýslulaga sem samþykkt voru á síðasta kjörtímabili og komi til með að fylla vel út í þá lagabálka sem fjalla um réttindi einstaklinga gagnvart stjórnkerfinu.
Hins vegar er það svo að það eru oft mál eins og þessi sem varða grundvallarréttindi einstaklinganna í þjóðfélaginu sem ekki fá eins mikla umræðu og dægurmálin. Það sést m.a. á því hve fáir þingmenn eru viðstaddir í dag og finnst mér það afar miður. Ég vona hins vegar að það muni frekar leiða til þess að þingmenn starfi betur að þessu máli í nefnd, það fái góðan og skilvirkan framgang í þinginu og verði til eins mikils framdráttar fyrir einstaklinginn gagnvart hinu opinbera og mér sýnist að stjórnsýslulögin hafi verið.
