Ögmundur Jónasson (andsvar):
Hæstv. forseti. Í skipunarbréfi félmrh. 4. okt. 1994 þar sem settur var af stað starshópur sem skyldi fjalla um samskiptareglur á vinnumarkaði segir að starfshópurinn skuli taka saman skýrslu um niðurstöðuna af athugun sinni leiði hún í ljós nauðsyn breytinga á íslenskri löggjöf. Í þessu sambandi skal hópurinn setja fram tillögur um það efni. Það gerði hópurinn ekki. Þvert á móti kom fram hjá fulltrúum samtaka launafólks að um þau efni sem menn á annað borð væru sammála skyldu menn semja. Menn skyldu ná samkomulagi um þau atriði. Menn skyldu semja um það. Menn skyldu ekki keyra í gegn löggjöf.
Ég mun koma nánar í efnislegri umræðu um frv. síðar að ýmsu sem hæstv. félmrh. vék að, en tvennt vil ég nefna: Áfangaskýrsla starfshópsins var sett til umræðu í verkalýðshreyfingunni í lok nóvember. Þær umræður fóru fram í nóvember og janúar. (Forseti hringir.) Þar var því hafnað að þetta yrði grundvöllur lagasetningar.
Í annan stað verður að taka það fram að í áfangaskýrslunni eru settir ákveðnir fyrirvarar og ég les upp úr henni, með leyfi forseta:
(Forseti (ÓE): Tíminn er búinn.)
,,Þar má nefna miðlun sáttasemjara og fyrirkomulag atkvæðagreiðslu um hana, boðun verkfalls og verkbanns, hlutverk ríkissáttasemjara á vinnudeilum og vinnustaðafyrirkomulag.`` (Forseti hringir.)
Þessir fyrirvarar eru grundvöllur þeirrar lagasetningar sem hæstv. félmrh. er að keyra í gegn.