Forsætisráðherra (Davíð Oddsson) (andsvar):
Herra forseti. Ég tel að ég hafi talað afar skýrt í svari mínu hér áðan. Ríkisstjórnin telur nauðsynlegt að lagfæra þær verklagsreglur sem á vinnumarkaðnum gilda. Við teljum að með frv. séu menn einmitt að því. Á frv. eins og öðrum mannanna verkum kunna að vera hnökrar, kunna að vera gallar. Og auðvitað mun hv. nefnd hlusta á athugasemdir Alþýðusambands Íslands og Vinnuveitendasambandsins eftir því sem þær kunna að berast og eftir því sem þær réttlæta, taka mið af því. Það hefur enginn útilokað að hlusta á þessar raddir og eiga samráð við þessa aðila nema síður sé.