[prenta uppsett í dálka] 114. fundur
Bryndís Hlöðversdóttir (andsvar):
Herra forseti. Því er enn og aftur haldið fram af hæstv. forsrh. að jafnvæginu á vinnumarkaði hafi ekki verið raskað, þ.e. að því jafnvægi sem ríkt hefur í samskiptum aðila vinnumarkaðarins undanfarin rúmlega 50 ár hafi ekki verið raskað.
Ég vil biðja hæstv. ráðherrann um að líta hér upp á þingpalla. Svona hefur mönnunin verið hér á þingpöllum undanfarna daga út af þeim frv. sem hafa verið til umræðu og enn heldur hæstv. forsrh. því fram að ekki sé um neina röskun að ræða á því jafnvægi sem ríkt hefur í samskiptum aðila vinnumarkaðarins. Það er sjaldan sem sést hefur jafnmikil eining í verkalýðshreyfingunni og einmitt nú. En enn heldur hæstv. ráðherra því fram að hér sé ekki um röskun á samskiptum aðila vinnumarkaðarins að ræða. Það er undarlegur veruleiki þykir mér.
