Forsætisráðherra (Davíð Oddsson) (andsvar):
Herra forseti. Ég átta mig ekki alveg á þeirri staðreynd að það að við höfum svo fjölmarga góða gesti á þingpöllum staðfesti að í frv. sé raskað jafnvægi á vinnumarkaði á milli Alþýðusambandsins og Vinnuveitendasambandsins. Mér er alveg fyrirmunað að koma því inn í minn ferkantaða lögfræðingshaus að svo sé. Mér er alveg fyrirmunað að átta mig á því.
Ég sé ekki að frv. ríkisstjórnarinnar sem hæstv. félmrh. fylgir hér úr hlaði, raski á nokkurn hátt jafnvægi þessara tveggja aðila sem getið er um í bréfinu. Það er hins vegar tilfærsla og breytingar hjá báðum aðilum. Nýjar verklagsreglur og vinnureglur settar. Það er allt önnur saga.