[prenta uppsett í dálka] 114. fundur
Kristján Pálsson (andsvar):
Herra forseti. Hv. þm. Sighvatur Björgvinsson er klókur stjórnmálamaður með langa þingreynslu. Honum tókst í andsvari við ræðu hæstv. forsrh. fyrr í dag að snúa sig út úr orðum mínum sem ég lét falla í andsvari við hv. þm. Margréti Frímannsdóttur að ég ásamt hv. þm. Guðmundi Hallvarðssyni væri á móti frv. hæstv. félmrh. Þetta gerði hann í andsvari svo að ég gat ekki svarað því þá og kýs því að gera það í andsvari við hv. þm. Sighvat Björgvinsson.
Það sem ég sagði um þetta mál var eftirfarandi, með leyfi forseta:
,,Það er mikill munur á vinnustaðarfélögum og vinnustaðarsamningum. Þetta munum við skoða í hv. félmn. Eins munum við skoða þröskulda í atkvæðagreiðslum en eins og kunnugt er hefur hæstv. félmrn. tekið vel í að breyta þeim ákvæðum.``
Þetta eru þau orð sem ég lét falla og er ekki yfirlýsing um það að ég sé á móti þessu frv. heldur að ég vil skoða þessa þætti í nefnd. Eins og ég sagði í dag tel ég að verkalýðshreyfingin sé einn af hornsteinum lýðræðisins og því munum við að sjálfsögðu skoða sjónarmið þeirra af fullri vinsemd.
