Félagsmálaráðherra (Páll Pétursson):
Herra forseti. Mér er ekki kunnugt um að það hafi farið fram nein sérstök félagsfræðileg rannsókn á fjölskyldum eða einstaklingum sem hafa orðið gjaldþrota sl. tíu ár en slíkar upplýsingar mun vera að finna, a.m.k. um fjölda þessa fólks, hjá dómsmrn. Á vegum félmrn. er unnið að aðgerðum til að fyrirbyggja og leysa greiðsluvanda fólks. Ráðgjafarstofa um fjármál heimilanna um tilraunaverkefni á vegum félmrn. sem ásamt því að veita ókeypis aðstoð og aðstoða fólk við að leysa sín vandamál vinnur að greiningu á þessum vandamálum. Í þeirri vinnu sem unnin er á vegum ráðuneytisins, í ráðgjafarstofu og í Húsnæðisstofnun ríkisins, er lögð áhersla á að þekkja vandann og tel ég því nauðsynlegt að fá fram heildarfjölda þeirra sem orðið hafa gjaldþrota og hver staða þeirra er eftir gjaldþrotið.
Við höfum hins vegar tölur um það hve margir gjaldþrotaúrskurðir hafa verið kveðnir upp og hverjir það eru sem biðja um gjaldþrotin. Það er fyrst og fremst tollurinn og gjaldheimtan.
Spurt er um hve margir hafa flutt úr landi undanfarin ár vegna gjaldþrots. Um það veit ég ekki. Það eru ekki til neinar tölur um það. Ástæður til brottflutnings geta verið margvíslegar og ein orsökin er fjárhagsvandræði.
Það er spurt hvaða ráðstafanir ríkisvaldið geri til að aðstoða einstaklinga við að byrja nýtt líf. Það eru engin sérstök úrræði sérmerkt þeim sem hafa gengið í gegnum gjaldþrot en þeim eiga að gagnast þau úrræði sem við erum með á prjónunum og erum að hrinda í framkvæmd, þ.e. þjónusta ráðgjafarstofunnar. Hún á að sjálfsögðu að aðstoða það fólk sem hefur verið úrskurðað gjaldþrota eða gjaldþrot blasir við. Ég tel að ráðgjafarstofan sé mikið framfaraspor og muni liðsinna þessu fólki eins og frekast er unnt.
Þá vil ég nefna frv. sem er til meðferðar í þinginu um réttaraðstoð við einstaklinga sem leita nauðasamninga. Ég tel að það sé mjög mikilvægt að hjálpa fólki fremur til að leita nauðasamninga heldur en gera það gjaldþrota. Þá er líka á ferðinni frv. sem ég mælti fyrir fyrir nokkrum vikum síðan um Innheimtustofnun sveitarfélaga þar sem heimilað er að semja ekki bara um vexti og dráttarvexti heldur einnig um höfuðstóla að hluta til eða öllu leyti. Hæstv. fjmrh. mælti úr þessum pakka fyrir frv. um tekjuskatt og eignarskatt og það er líka mjög stefnumarkandi, sérstaklega með tilliti til þess hverjir hafa haft forgöngu um að gera fólk gjaldþrota eða krefjast gjaldþrota, og þegar það frv. er orðið að lögum, þá eru persónuskattar umsemjanlegir eða aðrir skattar heldur en vörsluskattar. Vörsluskattar eru eins og menn vita skattar sem innheimtir eru fyrir ríkið af öðrum og á að standa skil á.
Ég vil einbeita mér að því að reyna að forða fólki frá því að verða gjaldþrota. Það er sjálfsagt að reyna að aðstoða hina eftir föngum sem hafa gengið í gegnum þessar hremmingar og þeir njóta að sjálfsögðu góðs af því sem gert er. En meginatriðið er að reyna að finna leiðir til þess að sem allra fæstir einstaklingar þurfi að ganga í gegnum gjaldþrot.
Varðandi fjórðu spurninguna vil ég segja það að ríkisstjórnin vinnur að því að aðstoða fólk við að komast inn á atvinnumarkaðinn, bæði fólk sem hefur misst vinnuna eða orðið gjaldþrota sem og aðra. Það er hins vegar erfitt að tengja aðstoðina við einn afmarkaðan þátt. Vandamálin geta verið svo ótrúlega fjölbreytt og því er erfitt að útbúa einhverja allsherjarforskrift fyrir þá sem hafa orðið gjaldþrota. Það eru svo margar ástæður fyrir því af hverju svona hefur farið fyrir fólki.