Þórunn Sveinbjarnardóttir (andsvar):
Herra forseti. Mér er ljúft og skylt að verða við beiðni hv. þm. Með leyfi forseta, vil ég vitna í stefnuskrá Kvennalistans. Þar stendur: Kvennalistinn vill að svokomnu máli leggja áherslu á að Ísland standi utan Evrópusambandsins. Það er ekkert sem hindrar okkur í að lögleiða góðar breytingar ættaðar frá Evrópu nema vilja og skilningsleysi íslenskra stjórnvalda. Stefna Kvennalistans í þessu máli er mjög skýr. Mitt álit á því máli er líka mjög skýrt og það hefur komið fram opinberlega. Ég er ósammála stefnu Kvennalistans að þessu leyti. Ég tel best að látið verði á það reyna með aðildarviðræðum við Evrópusambandið hvaða kjör okkur bjóðast í Brussel.