[prenta uppsett í dálka] 127. fundur
Félagsmálaráðherra (Páll Pétursson):
Herra forseti. Ef ekki verður af flutningnum þarf auðvitað að skipa stjórn því að þetta er bráðabirgðaástand, ég legg alveg sérstaka áherslu á það. Það hefur tafist lengur en ég ætlaði og það verður að ráða bót á því.
Hitt er annað mál að eins og lögin um Brunamálastofnun eru núna eru þau óskýr. Valdmörk á milli stjórnar og brunamálastjóra eru ekki nægilega skilgreind í lögunum. Frv. tók breytingum í meðförum Alþingis, því miður, og það varð til þess að valdmörk urðu óskýrari og fyrir bragðið kom upp sá styrr sem stóð um stofnunina í fyrravor. Ég vek athygli á því að ég held að Brunamálastofnun sé ekkert í hers höndum og það hafi verið tiltölulega rólegt og friðsamlegt um starfsemi hennar upp á síðkastið.
