[prenta uppsett í dálka] 127. fundur
Þórunn Sveinbjarnardóttir:
Virðulegi forseti. Það er satt að segja dapurlegt að hlýða á mál hv. 7. þm. Reykn. í dag. Ég hef ekki setið á þingi í vetur enda aðeins varaþingkona, en ég man vel eftir því hvað framsóknarmenn sögðu í kosningabaráttunni sl. vor og því spyr ég: Er þetta sama fólkið? Er þetta sami flokkurinn?
Þá var svo sannarlega höfðað til yngri kjósenda á Íslandi. Menntamálin voru mál málanna og á því m.a. flutu tveir framsóknarmenn inn á hið háa Alþingi í Reykjavík. En nú hefur allt snúist á verri veg. Það væri gleðilegt ef menntamálin og framtíð þjóðarinnar fengi sama sess í stefnu Framsfl. og sauðkindin hefur lengstum haft.
Það er líka dapurlegt að horfa upp á það hvernig hvert stjfrv. á fætur öðru sem frjálshyggjupostular Sjálfstfl. --- nema þeir séu nú einnig komnir í Framsókn --- hafa soðið saman, rennur í gegn hjá Framsfl. eins og ekkert sé og það er hvorki æmt né skræmt. Því hlýt ég að spyrja: Hvar er sjálfsvirðing hv. þingmanna Framsfl. þegar kemur að menntamálunum?
