Þórunn Sveinbjarnardóttir (andsvar):
Virðulegi forseti. Mikil er veruleikafirring Framsfl. þessa dagana. Mig undrar að hv. þm. leyfir sér að segja í pontu á hinu háa Alþingi: Hver hefur ekki efni á að greiða skólagjöldin? Í hvaða tengslum er hv. þm. við veruleikann í landinu? Það hefur líka komið fram í máli hæstv. menntmrh. í vetur að hækkuð skólagjöld við háskólann hafi m.a. valdið því að fólk hafi hrakist frá námi og þá helst barnafólk. Ég minni aftur á kosningabaráttu Framsfl. sl. vor sem snerist öll um unga fólkið, menntamálin og framtíðina, störfin sem átti að búa til, skólagjöldin sem átti að lækka. Hvar er samviska Framsfl. í þessum efnum?