Kristján Pálsson (andsvar):
Herra forseti. Ef hv. þm. Steingrímur J. Sigfússon les tillögu okkar fjórmenninganna sér hann að í þeirri tillögu er gert ráð fyrir því að eignaraðildin sé að meiri hluta til íslensk þannig að samkvæmt henni er engin hætta á öðru en að íslensk yfirráð séu tryggð.
Aftur á móti hef ég verið að reyna að færa rök fyrir því að bein fjárfesting sé í rauninni miklu tryggari leið til þess að styrkja sjávarútveginn en óbein því að hún gæti leitt til þess að arður sjávarútvegsins rynni í gegnum önnur fyrirtæki eða til annarra fyrirtækja í einhverri fyrirtækjakeðju. Ég er ekki að segja að þessi reikningsdæmi gangi öll saman upp og ég vona svo sannarlega að það verði ekki farið út í þær kúnstir. Auðvitað býður þetta upp á það og það á síðan eftir að koma í ljós hvort það verður látið reyna.