Frsm. minni hluta efh.- og viðskn. (Ágúst Einarsson) (andsvar):
Herra forseti. Það er hægt að rekja ýmislegt sem viðvíkur bæði svokallaðri æviráðningu, biðlaunum, veikindamálum, fæðingarorlofi og málskotsrétti og mörgu fleiru sem tengist kjarasamningum sem tekið er á með íþyngjandi hætti í þessu frv.
Varðandi það að ráðherrann neitaði að mæta á fund efh.- og viðskn. má geta þess að hann mætir á fund fjárln. og aðrir ráðherrar ef svo ber undir. Ég vil einnig geta þess að með mér í minni hluta nefndarinnar eru hv. þm. Steingrímur J. Sigfússon og Jón Baldvin Hannibalsson, tveir fyrrv. ráðherrar. Og það var upplýst að --- það er ekkert alvanalegt en kemur fyrir --- að menn hafa aldrei talið það neitt tiltökumál að mæta í þingnefnd til að skýra tiltekna þætti í sínum þingmálum. Herra forseti, framkoma hæstv. fjmrh. gagnvart þingnefndinni varðandi þetta mál er ámælisverð.