[prenta uppsett í dálka] 136. fundur
Össur Skarphéðinsson (andsvar):
Herra forseti. Svo ég byrji á að svara því sem kom fram í upphafi máls hv. þm. þá eru ákveðin tengsl á milli þykkra höfuðskelja og kynlífs hjá löxunum. Það er einfaldlega þannig að þeir sem hafa þykkar höfuðskeljar eru yfirleitt stærri og þeir hafa meiri sjens. En hjá laxinum þekkist það líka að þeir sem eru afskaplega smávaxnir eiga líka sinn sjens. Þeir eru kallaðir ,,sneakers`` og hv. þm. veit þetta auðvitað. Á sínum tíma vorum við báðir í þeim hópi. Við vorum ,,sneakers`` og gekk bara vel. En það er nú önnur saga, herra forseti. Ég vildi aðeins segja um það sem hv. þm. sagði að ég dreg mjög í efa að meiri hluti þjóðarinnar sé þeirrar skoðunar að það sé eðlilegt að fara með þessum hætti gegn biðlaunaréttinum. Hv. þm. orðaði það svo: ,,Eftir því sem mér hefur skilist á samtölum mínum við fólk.`` Þá vil ég spyrja hv. þm. hvenær hann náði því að tala við 100 þús. Íslendinga. Satt að segja hef ég ekki orðið var við að stjórnarliðar séu í miklu sambandi við kjósendur. Og því miður virðist það t.d. ekki hafa komist inn fyrir höfuðskeljar hvorki hv. þm. Vilhjálms Egilssonar eða annarra stjórnarliða að það er ekki til eitt einasta verkalýðsfélag og ekki einn umsagnaraðili í gervöllu landinu fyrir utan Vinnuveitendasamband Íslands sem hefur lostið upp fagnaðarópi yfir þeim smánarfrumvörpum sem nú liggja fyrir í kistu hv. þm. Vilhjálms Egilssonar. Ég þakka honum því fyrir að upplýsa mig um þetta. En fyrst hann hefur svona í samtölum sínum við þjóðina verið að kanna hitt og þetta --- veit hann nokkuð um fylgi við væntanlegan forsetaframbjóðanda í röðum Alþfl.?
