Jón Baldvin Hannibalsson:
Herra forseti. Ein meginrök hæstv. fjmrh. og talsmanna hæstv. ríkisstjórnar til stuðnings þessu frv. hafa verið þau að það sé til þess að koma í staðinn fyrir úrelta löggjöf og það sé sett fram í anda nútímalegrar stjórnunarstefnu. Nútímaleg stjórnunarstefna byggir á þeim grundvallarhugmyndum að draga úr miðstjórnarvaldi og boðvaldi og leita eftir því að setja samskipti vinnuveitenda og starfsmanna í farveg samráðs og samvinnu. Sú málsmeðferð, sem hæstv. ríkisstjórn beitir í þessu máli, þverbrýtur þessa grundvallarreglu og þegar af þeirri ástæðu er ástæða til þess í atkvæðagreiðslu um 1. gr. frv. að hafna því og vísa því til ríkisstjórnarinnar. Ég segi nei, herra forseti.