[prenta uppsett í dálka] 138. fundur
Ögmundur Jónasson:
Hæstv. forseti. Ég vil sérstaklega vekja athygli á því hvað hér er verið að greiða atkvæði um. Hér er verið að greiða atkvæði um heimild til fjmrh. til að breyta ákvörðunum einstakra forstjóra um viðbótarlaun ef þær brjóta í bága við reglurnar eins og segir orðrétt í þessu ákvæði og afnumin heimild einstakra forstöðumanna til að ákveða starfsmönnum viðbótarlaun ef rekstrarútgjöld og rekstrarafkoma stofnunar er ekki í samræmi við fjárlög. Hvaða stofnanir skyldu þetta vera? Þetta eru sjúkrastofnanir, þetta eru skólarnir, þetta eru stóru, fjölmennu láglaunavinnustaðirnir sem á að vera heimilað samkvæmt þessari grein að afnema þessar viðbótargreiðslur hjá. Ég vek sérstaklega athygli á því að talað er um ,,reglurnar``. Þingmenn hafa aldrei fengið að sjá þessar reglur. Þessar reglur eru ekki til og það hefur margoft verið farið fram á það við þessa umræðu að hæstv. fjmrh. og hv. formaður efh.- og viðskn. geri grein fyrir þessum reglum. Þær eru ekki til. Þetta er marklaust tal. Ég segi nei.
