[prenta uppsett í dálka] 138. fundur
Vilhjálmur Egilsson:
Hæstv. forseti. Það er mjög eðlilegt að takmarka biðlaunarétt með þeim hætti sem gert er í þessu frv. Það þýðir að starfsfólk sem er í vinnu hjá ríkinu og verður fyrir því að starf þess er lagt niður nýtur raunverulegra biðlauna ef það heldur ekki áfram störfum, annaðhvort hjá sama vinnuveitanda eða þá í öðru starfi, og réttindin sem slík eru því ekki takmörkuð þannig að tjóni valdi svo heitið geti.
Varðandi það að ekki skuli samið um þetta í kjarasamningum fer það einfaldlega ekki saman að halda því fram að eitthvað sé stjórnarskrárvarinn eignarréttur einstaklings og síðan að hægt sé að semja um það í kjarasamningum. Að sjálfsögðu er ekki hægt í kjarasamningum að taka stjórnarskrárvarinn eignarrétt af einstaklingum. Ég hygg að engin óvissa sé um að það stenst stjórnarskrá að takmarka biðlaunaréttinn með þessum hætti og þeim peningum, sem færu í málaferli af því tagi, væri kastað á glæ.
