[prenta uppsett í dálka] 140. fundur
Bryndís Hlöðversdóttir (andsvar):
Herra forseti. Nú er hæstv. ráðherra kominn algerlega í hring með mál sitt. Hann sagði áðan að hann væri einmitt ekki að leggja til íhlutun í innri málefni stéttarfélaga með þessu frv. Það er einmitt verið að gera það með því að kveða á um það hvernig reglur skuli gilda um atkvæðagreiðslur. Og ekki aðeins það heldur gerir hæstv. ráðherra að umtalsefni hvernig það væri ef stærsti flokkurinn á Alþingi ætti að ráða öllu. Það er einmitt það sem er verið að leggja til með þeim tillögum sem voru lagðar fram um atkvæðagreiðslu varðandi miðlunartillögur. Stærsti flokkurinn á að ráða öllu og hann á að ráða stefnunni. Það er einmitt það sem hæstv. ráðherra leggur til.
