[prenta uppsett í dálka] 140. fundur
Félagsmálaráðherra (Páll Pétursson) (andsvar):
Herra forseti. Ég hef ekkert verið að alhæfa í þessari umfjöllun minni og ég hef heldur ekki sagt að verkalýðsfélögin hafi lagt blessun sína yfir frv. eins og það liggur fyrir núna eða þær breytingartillögur sem á því voru gerðar. En ég vek athygli hv. þm. á því að verkalýðsfélögin voru fyrst og fremst að mótmæla upphaflegu frv. og gagnrýndu sum ákvæði þess. Sum sögðu bara: Burt með þetta og létu þar við sitja. Það var reynt að koma til móts við rökstuddar ábendingar, rökstudda gagnrýni á einstaka efnisþætti málsins í nefndarstarfinu og ég vonast til þess að verkalýðshreyfingin sjái ekki í þessu frv. atriði sem meiða hana eða verða henni til tjóns. Ég tel meiri líkur á aukinni launajöfnun. Ég tel meiri líkur á að verkalýðshreyfingin nái vopnum sínum og árangri í kjarasamningum samkvæmt breyttum lögum en reynslan hefur sýnt að hún hefur gert samkvæmt þeim lögum sem í gildi eru.
