Gísli S. Einarsson:
Herra forseti. Ég mótmæli vinnubrögðum ríkisstjórnarinnar og skora enn á fjarstaddan hæstv. forsrh. Davíð Oddsson að sjá til þess að frv. þetta komi ekki frekar til umfjöllunar á þessu þingi. Framsfl., hæstv. utanrrh., fer gegn þeim loforðum sem hann gaf fyrir síðustu kosningar um samstarf og samvinnu við fólkið í landinu. Þau loforð eru svikin með vinnubrögðum um þetta frv. 7--10 þúsund manna mótmæli í Reykjavík og þúsunda úti um land 1. maí eru sögð marklaus og fárra manna hjal. Andmæli forustumanna stéttarfélaganna sem í eru meira en 60 þúsund félagsmenn eru að engu höfð. Frv. og afleiðingar þess stefna íslensku efnahagslífi í stórhættu og eru aðför að þeirri sátt sem hefur ríkt þó þjóðin hafi orðið að búa við þröngan kost í efnahagskreppu síðustu ára. Ég segi nei, herra forseti og ég segi aftur nei.