Ásta B. Þorsteinsdóttir (andsvar):
Herra forseti. Það er gleðilegt að það skuli vera áform um að veita meira fjármagn í sérkennslu. Ég fagna því svo sannarlega. En ég segi aftur að miðað við þá nákvæmu útfærslu sem á þessu frv. er varðandi fjármögnun á ýmsum þáttum við kostnað vegna tilfærslunnar skýtur skökku við að ekki skuli hafa verið unnið jafnnákvæmlega í þessum frumvarpstexta að því hvernig áformað er að standa að sértækum úrræðum gagnvart þessum hópi nemenda. Ég tel óásættanlegt að þeirri heimavinnu skuli ekki hafa verið lokið í ráðuneytinu áður en tilfærsla grunnskólans til sveitarfélaganna á sér stað. Eftir þeim upplýsingum sem hér hafa komið fram hefur ekkert breytt þeirri skoðun minni.