Samgönguráðherra (Halldór Blöndal):
Herra forseti. Ég hélt að ég hefði talað nægilega skýrt til þess að ekki kæmi upp misskilningur. Ég varð var við það af máli hv. 12. þm. Reykn., Kristínar Halldórsdóttur, og eins á máli hv. 9. þm. Reykn., Guðmundar Árna Stefánssonar, að ég hefði talið að sú sérstaka undirbúningsnefnd sem 7. gr. frv. fjallar um eigi ekki að fjalla um starfsmannamál. Þetta er mikill misskilningur og þarf auðvitað ekki annað en lesa efni greinarinnar til að skilja að sá sé tilgangur nefndarinnar hvort sem horft er til frv. eða til brtt. meiri hluta samgn. Ég tók sérstaklega fram í ræðu minni í dag að þessi breyting hefði verið gerð í samráði við stéttarfélög Pósts og síma þannig að það er algerlega út í hött að halda því fram að ég hafi talið að þessi nefnd hefði ekki einmitt það hlutverk sem ég var að lýsa. Nefndin skal hafa heimild til þess að gera hvers kyns löggerninga sem eru nauðsynlegir til undirbúnings stofnunar félagsins og fyrirhugaðri starfrækslu. Við stofnunina skal félagið bundið við umrædda löggerninga. Þessi ákvæði eru alveg skýr.
Á hinn bóginn er það svo nú ef þetta frv. verður ekki að lögum að starfsmannamálin eru í höndum fjmrh. en ekki samgrh. Ef það ætti að koma til þess að gera nýja kjarasamninga við starfsfólk Póst- og símamálastofnunar væri það í höndum fjmrh. en ekki samgrh.
Í öðru lagi tek ég fram, herra forseti, varðandi 2. gr. frv. Skilin eru auðvitað glögg á milli 1. mgr. og 2. mgr. Í 1. mgr. er fjallað um það tilvik svo að ég taki Cantat 3 sem dæmi, ef það skyldi fara svo að Póstur og sími hf. sæi ástæðu til þess að auka eignaraðild sína í Cantat 3, þá mundi það falla undir 1. mgr. 2. gr. Ef við hins vegar værum að tala um það að skipta fyrirtækinu upp í póstþáttinn og símaþáttinn eða fjarskiptaþáttinn værum við að tala um 2. mgr. 2. gr. og auðvitað hefði þá eðli málsins samkvæmt hlutafélagið heimild til þess að auka hlut sinn í Cantat 3 án atbeina Alþingis. (Gripið fram í: En selja Landssímann?) Og selja líka og fara með venjulega eignaumsýslu á slíkum hlutum. Fjölmörg fyrirtæki í Reykjavík og á Íslandi á fjarskiptasviði og rafeindasviði hafa leitað hófanna og verið með fyrirspurnir til stjórnar Pósts og síma um það hvort til samvinnu þróunarstarfs geti komið. Ég minni í því sambandi sérstaklega á þá miklu samvinnu sem átti sér stað á milli Háskóla Íslands og Flugmálastjórnar sem leiddi til þess að Íslendingar hönnuðu og bjuggu til stýrikerfið í hinni nýju flugstjórnarmiðstöð eða verulegu eða öllu leyti. Ég er ekki verkfræðingur þannig að ég þori ekki að fara mjög út í þá sálma en lögðu þar mjög mikið til í hinni nýju hönnun á stýringunni í hinni nýju flugstjórnarmiðstöð.
Í 2. mgr. er alveg tekið af skarið um það að óheimilt sé að leggja niður einstaka starfsþætti í Pósti og síma hf. Þar er sérstaklega kveðið á um það að slík dótturfyrirtæki samkvæmt þeirri grein séu alfarið í eigu ríkisins og þá þurfi atbeini Alþingis til að koma. En fyrri greinin lýtur að almennri eignaumsýslu til hugsanlegs samstarfs á því sviði sem þar er markað en það er sagt að tilgangur félagsins sé að veita hvers konar fjarskiptaþjónustu, póstþjónustu og fjármálalega umsýslu sem er starfsvettvangur sem Póst- og símamálastofnun hefur unnið á.