Hjörleifur Guttormsson:
Virðulegur forseti. Það frv. sem hér er verið að greiða atkvæði um ber yfirskriftina ,,Frumvarp til laga um náttúruvernd``. Það eru röng skilaboð frá þeim sem flytja málið vegna þess að þetta er að verulegu leyti endurflutningur á óbreyttum ákvæðum um náttúruvernd þannig að ekki er um neina viðhlítandi heildarendurskoðun laganna að ræða. Þetta á m.a. við um 1. gr., markmið náttúruverndar þar sem ekki er breytt neinu frá því sem verið hefur í gildandi lögum um aldarfjórðungsskeið þrátt fyrir öll þau nýju viðhorf sem fyrir liggja í umhverfismálum og náttúruvernd á þessu tímabili.
Ég tek ekki afstöðu til þeirra greina sem eru fluttar óbreyttar heldur sit ég hjá við þá atkvæðagreiðslu en ég mun koma að einstökum þáttum í atkvæðaskýringum síðar.