Hjörleifur Guttormsson:
Virðulegur forseti. Hér er verið að lögleiða áfram gersamlega úrelt og haldlaus ákvæði varðandi efnistöku í landinu, malarnám og annað. Það er hörmulegt til þess að vita að við yfirferð náttúruverndarlöggjafar skuli ekki reynt að taka á þessum ákvæðum. Sérstakt þingmannafrumvarp lá fyrir í nefndinni en fékkst ekki tekið á dagskrá, frv. sem kom fram í haust um þessi efni. Þetta eru vinnubrögð af þeim toga, virðulegur forseti, að það er Alþingi til vansa að ganga þannig frá löggjöf í þessum viðkvæma málaflokki.