[prenta uppsett í dálka] 23. fundur
[13:43]
Hjörleifur Guttormsson:
Virðulegi forseti. Það er gott að þessu máli er hreyft í formi fyrirspurnar og gagnlegt að fá upplýsingar frá hæstv. ráðherra. Ég tek undir það sem fram kom í svari hæstv. ráðherra að þörf sé á að styrkja sýslumannsembættin og færa til þeirra fleiri verkefni þó auðvitað geti verið álitamál hver þau eigi að vera. Ég held að það sé kannski þörf á því að hafa einbeittari forustu um það að eitthvað gerist á þessu sviði en sjálfdæmi sem hér heyrist að hverju ráðuneyti sé falið í málinu og síðan biðstaða eða sem sagt ekki gengið eftir því innan ákveðinna tímamarka. Ég held líka að allar spurningar um tilfærslu á embættum séu ekki aðeins viðkvæmar heldur líka mikið álitamál og því nauðsynlegt að gott samráð sé haft um það. Ég ætla ekki að fara út í að ræða þar einstakar hugmyndir sem var áður hreyft. Sem betur fer var horfið til baka með það og málið tekið í víðtækari skoðun. Fyrir þinginu liggur fyrirspurn af minni hálfu um betri aðbúnað að sýslumannsembætti á Seyðisfirði og vænti ég svars við þeirri fyrirspurn innan tíðar.
