[prenta uppsett í dálka] 33. fundur
[13:41]
Fjármálaráðherra (Friðrik Sophusson):
Virðulegi forseti. Ég mæli fyrir frv. til laga um breyting á lögum nr. 48/1992, um breyting á lögum nr. 65/1982, um skattskyldu innlánsstofnana, með síðari breytingum. Frv. þetta er 135. mál þingsins og er á þskj. 161.
Í frv., sem er afar einfalt, er lagt til að frestað verði gildistöku ákvæða laganna að því er varðar skattskyldu Iðnþróunarsjóðs. Forsaga málsins er sú að með lögum nr. 48/1992 voru opinberir fjárfestingarlánasjóðir gerðir skattskyldir. Sérregla var þó í lögunum að því er varðaði Iðnþróunarsjóð þar sem gert var ráð fyrir að skattskylda hans kæmi til framkvæmda síðar, þ.e. á árinu 1995. Þetta er byggt á þeirri forsendu að fyrirheit hafi verið gefin allt frá því að Iðnþróunarsjóður var settur á laggirnar fyrir 25 árum að hann yrði ekki skattlagður fyrr en stofnfé hinna Norðurlandanna hefði að fullu verið endurgreitt. Í samræmi við þetta var tekjuskattur og eignarskattur lagður á Iðnþróunarsjóð við álagninguna í ár.
Í ljósi þess að endurgreiðslu stofnfjár lauk ekki fyrr en 8. mars sl. þykir eðlilegt með vísan til framangreindra forsendna að ákvæðum laganna verði breytt á þann veg að upphæð skattskyldu miðist við þetta tímamark, þ.e. þegar sjóðurinn komst að fullu í eigu íslenska ríkisins.
Að svo mæltu legg ég til að frv. verði að lokinni umræðunni vísað til 2. umr. og hv. efh.- og viðskn.
