[prenta uppsett í dálka] 33. fundur
[14:53]
Pétur H. Blöndal (andsvar):
Herra forseti. Ég vil minna hv. 9. þm. Reykv., Jón Baldvin Hannibalsson, á það að þingmenn eru eingöngu bundnir sannfæringu sinni. Sem slíkur hef ég þá skoðun á þessu máli að ef hægt er að koma á samræmingu á fjármagnstekjuskatt, sem hættir að beina fjármagni frá atvinnulífinu til ríkissjóðs, gæti ég hugsanlega samþykkt tillögur sem komu frá nefndinni. Þær tillögur eru alls ekki fullmótaðar. Í ljósi þessara varnagla og þess sem ég hef haft efasemdir um, þ.e. að fjármagnstekjuskattur, sérstaklega á vexti, kunni að valda bæði fjárflótta, minni sparnaði og hækkun á vöxtum en það kæmi illa við atvinnulífið og sérstaklega skuldara, þá er ekkert sjálfgefið að menn taki upp fjármagnstekjuskatt á vexti. Menn hafa í nefndinni miklar efasemdir um það og mikið hefur verið rætt einmitt um þann þátt hvaða áhrif skattlagningin á vexti muni hafa á sparnað í landinu og á fjárflótta til útlanda og á upphæð vaxta. Hvort vextir kunna að hækka en það kemur þá í bakið á skuldurum.
