[prenta uppsett í dálka] 35. fundur
[15:11]
Magnús Stefánsson:
Virðulegur forseti. Ég beini fyrirspurn til hæstv. menntmrh. varðandi móttöku- og hlustunarskilyrði Ríkisútvarps og sjónvarps í Grundarfirði. Þar sem móttöku- og hlustunarskilyrði útvarps og sjónvarps í Grundarfirði eru oft mjög slæm og þegar veðurskilyrði eru slæm vill oft bregða svo að hvorki heyrist í Ríkisútvarpinu né sjónvarpinu. Þarna er um að ræða bæði öryggismál fyrir íbúa á staðnum fyrir utan það að þarna er um sjálfsagða þjónustu að ræða.
Heimamenn og sveitarstjórn Eyrarsveitar hafa ítrekað óskað eftir úrbótum í þessum málum og ég spyr hæstv. menntmrh. hvort áform séu um úrbætur í þessum efnum og hvenær vænta megi þeirra úrbóta.
