[22:02]
Egill Jónsson (andsvar):
Virðulegi forseti. Lýsing mín á búvörusamningi og samlíking við Gamla sáttmála á við búvörusamninginn sem hv. ræðumaður gerði árið 1991 og varð þess valdandi að sauðfjárræktin fór á höfuðið á tveimur fyrstu árum samningsins. Þannig að eitthvað hefur skolast til í þessum efnum. Í þessum samningi hefur hins vegar verið breytt til að því leyti að það er ekki lengur bannað að flytja út kindakjöt, eins og var í samningi fyrirspyrjanda hér áðan. Auk þess, eins og ég gat sérstaklega um, hafa verið gerðar breytingar á búvörulögunum sem eiga að geta skilað mikilvægum árangri í þróunarferli þessara verkefna. Og það er ástæðan fyrir því að ég styð þetta nefndarálit. Ég vek hins vegar athygli á því að hér er búvörusamningurinn með öllum sínum göllum og kannski einhverjum kostum, ekki til atkvæðagreiðslu og þar með er ég ekki að taka afstöðu til hans sem slíks.