[22:07]
Egill Jónsson (andsvar):
Virðulegi forseti. Varðandi útflutningsbann á kindakjöt í fyrrv. búvörusamningi er þess að geta að þar stendur skýrum orðum að óheimilt sé að flytja það kindakjöt sem er innan greiðslumarks á erlendan markað. Það var áreiðanlega kindakjöt en ekki svínakjöt þannig að það er óumdeilanlegt að svona bann var í samningnum.
Í öðru lagi er vert að minna á að sá búvörusamningur var ekki lögtekinn. Haustið 1991 var hann ekki lögtekinn á Alþingi. Það voru hins vegar gerðar breytingar á búvörulögunum til þess að hægt væri að framkvæma viss efni samningsins, en það var ekki sú samtenging á milli þess samnings og nú er við búvörulögin. Allt þetta byggist því á miklum misskilningi og sýnir reyndar að enn er hv. þm. utan við sig í þessum málum, eins og hann var þegar hann gerði þennan búvörusamning.