[15:22]
Félagsmálaráðherra (Páll Pétursson) (andsvar):
Herra forseti. Því miður hef ég ekki tiltæk gögn um hvað nákvæmlega margar íbúðir standa nú auðar. En þegar slysið varð á Flateyri lét ég kanna hvað væri til af auðum íbúðum í félagslega kerfinu. Þær voru þá 102 og það hefur eitthvað bæst við síðan. Þær eru ekki bara á tveimur stöðum á landinu. Þær eru á mjög mörgum stöðum. Þær eru í flestum byggðarlögum á Vestfjörðum, mörgum byggðarlögum á Austfjörðum og á Norðurlandi nokkrum. Það er að vísu rétt að félagslegar íbúðir standa ekki auðar í Reykjavík í stórum stíl. Félagslega kerfið hér hefur lánast best en er þó engan veginn gallalaust. Í Reykjavík standa að vísu margar íbúðir auðar þó það sé ekki í félagslega kerfinu.