[14:36]
Vilhjálmur Egilsson:
Hæstv. forseti. Ég vil bara leiðrétta þann misskilning ef einhver hefur staðið í þeirri meiningu að ekki væri samstaða hjá meiri hlutanum í efh.- og viðskn. um afgreiðslu bandormsins. Þar standa allir saman. Eins vil ég geta þess að meiri hlutinn hyggst flytja frv. með þremur efnisatriðum sem hafa verið nefndarmönnum í efh.- og viðskn. vel kunn.
Við afgreiddum í gærkvöldi lánsfjáráætlun, frv. til lánsfjárlaga, og eins lukum við vinnunni við bandorminn, að undanteknum þremur til fjórum atriðum frá heilbr.- og trn. sem við kláruðum í morgun. Hins vegar stóð ég í þeirri meiningu eftir fund efh.- og viðskn. í morgun að fulltrúar minni hlutans í nefndinni þyrftu tíma til að ljúka nál. og þyrftu að leggja mikið á sig til í þeirri vinnu þannig að ekki væri hægt að ræða málið fyrr en nokkuð væri liðið á daginn. Ég sé núna og það kemur á óvart að þeir hafa allt í einu hafa tíma til að þrasa um mál utan dagskrár um stjórn þingsins. (KÁ: Þeim ber skylda til að sitja þingfundi.) (ÖS: Þú hefur kannski ekki gert þér grein fyrir því.)