[prenta uppsett í dálka] 73. fundur
[13:09]
Steingrímur J. Sigfússon:
Herra forseti. Við 2. umr. þessa máls gagnrýndum við mjög harðlega þá breytingu að afnema verðuppfærsluákvæði tekjuskattslaganna og draga þar með úr tengingu við verðlagsþróun sem verið hefur á bótaliðum og þáttum eins og persónufrádrætti og skattfrelsismörkum í skattalögum okkar. Við greiddum að sjálfsögðu atkvæði gegn þeim tillögum frv.
Á hinn bóginn eru í frv. einnig jákvæðir þættir sem ástæða er til að taka undir, t.d. skrefið sem stigið er í átt til þess að draga úr óhóflegri tekjutengingu barnabótaauka í skattkerfinu. Sömuleiðis má nefna upptöku fyrningarákvæða á einkabifreiðar og fleira í þeim dúr. Með vísan til þessarar afstöðu sitjum við hjá við endanlega afgreiðslu málsins og ítrekum gagnrýni okkar á kerfisbreytinguna sem í því felst. En auðvitað er ljóst að með einhverjum hætti þarf að leggja á tekjuskatt á næsta ári og því kannski ekki efni til að leggjast gegn málinu sem slíku við lokaafgreiðslu þess.
