Hjörleifur Guttormsson (andsvar):
Virðulegi forseti. Það er vissulega góðra gjalda vert ef um þrengingu er að ræða á efnum og hlutum sem heimilt er að varpa í hafið. Þessi mál verða auðvitað gaumgæfð í þingnefnd og borin saman við gildandi reglur á þessu sviði. Ég tel að við eigum að sníða mjög þröngan stakk í þessum efnum og taka almennt séð umgengni okkar við hafið og hafsbotninn til endurskoðunar þannig að bætt verður úr ýmsu sem aflaga fer nú.