Valgerður Sverrisdóttir:
Hæstv. forseti. Ég vil lýsa ánægju með að frv. sem hefur verið til umræðu er komið til lokaafgreiðslu, frv. um Landsvirkjun. Frv. felur í sér mikilvægar breytingar sem m.a. felast í því að teknar eru ákvarðanir um lækkun orkuverðs á árunum eftir aldamót um 2--3% á ári og greiddur skuli arður til eignaraðila, til ríkisins, Reykjavíkurborgar og Akureyrarbæjar. Samkvæmt samkomulagi eignaraðila verða arðgreiðslur víkjandi fyrir lækkun orkuverðs.
Þá er einnig mikilvægt að í tengslum við afgreiðslu þessa máls var ákveðið að verja 80 millj. kr. til atvinnuuppbyggingar á landsbyggðinni. Það kemur mér hins vegar ekki á óvart, frekar en nokkrum öðrum, að Alþb. sé einn flokka á móti þessari lagasetningu. Það segir okkur fyrst og fremst að flokkurinn er staðnaður og beitir sér gegn öllum breytingum í þjóðfélaginu sem snúa að því að færa atvinnulíf og þjóðlífið almennt til nútímahorfs. Ég segi já.