[prenta uppsett í dálka] 71. fundur
Kristján Pálsson (andsvar):
Herra forseti. Ég taldi mig hafa lagt mitt af mörkum til að hægt væri að fara út í þessar framkvæmdir og semja um niðurskurð á móti með sveitarfélögunum. Þessi hugmynd var borin undir sveitarstjórnir, bæjarstjóra í sveitarfélögum hér í kring og í þeirra huga var þetta mjög ásættanleg leið. Þá er ekki bara verið að tala um framkvæmdir í Reykjavík heldur einnig í öðrum sveitarfélögum á höfuðborgarsvæðinu. Þannig að ég á erfitt með að sjá að þessar 250--300 millj. kr. sem um er rætt eigi eingöngu að fara til framkvæmda í Reykjavík. Ef það er meiningin að borgarverkfræðingur einn ráði því hvernig á að úthluta þessu þá er náttúrlega ljóst hvert þetta fer. En ef sveitarfélögin á höfuðborgarsvæðinu sameinast um þetta og komast að samkomulagi um að þetta verði svona þá er í sjálfu sér ekkert við því að segja. En þeir vita það vel, sveitarstjórnarmenn hér í kring, að um það var rætt að þetta mundi skiptast með samkomulagi sveitarstjórnarmanna og ráðherra og að um þetta yrði full sátt.
