Einar K. Guðfinnsson:
Virðulegi forseti. Ég vil byrja á því að þakka hv. fyrirspyrjanda og hæstv. forsrh. fyrir þær upplýsingar sem hér hafa komið fram. Það sem mér finnst standa upp úr í þessari umræðu eru þær upplýsingar sem fram komu í máli hæstv. forsrh. um vaxtastigið í Bretlandi sem leiðir það í ljós að vextir á verðtryggðum pappírum eru verulega lægri en þeir gerast hér á landi.
Það kom fram í máli hæstv. ráðherra að þeir liggja á bilinu 3--4% umfram verðtryggingu en á ríkispappírum hér á landi er samsvarandi tala 6--7%. Ef við værum að tala um skuldbindingar almennings, lán sem almenningur gæti tekið í bönkum, þá værum við sjálfsagt að tala um lán á bilinu 8% til jafnvel 12% umfram verðtryggingu þannig að við blasir í þessu samhengi að vextir hér á landi eru náttúrlega allt of háir fyrir utan það að allar efnahagslegar forsendur hafa verið skapaðar fyrir því að við gætum lækkað vexti. Hér hefur opinber lánsfjárþörf minnkað. Hér hefur sem betur fer ríkt stöðugleiki í verðlagi og við blasir á afkomutölum sem viðskiptabankarnir hafa verið að birta á undanförnum dögum að afkoma þeirra hefur batnað.