[prenta uppsett í dálka] 120. fundur
Hjálmar Jónsson (andsvar):
Herra forseti. Gjarnan vil ég reyna að varpa ljósi á það sem hv. þm. Ólafur Þ. Þórðarson nefndi áðan. Ég er ánægður með að heyra að hann vill að jafnræði sé á milli embætta vígslubiskupanna í Skálholti og Hólum og virði það sjónarmið. Á hitt er að líta að vígslubiskup á Hólum hefur mun minna umdæmi og færri sóknir í sínu prestakalli þannig að þar er nokkur munur á milli. Vígslubiskup í Skálholti mun vafalaust hafa messuskyldu áfram í dómkirkjunni í Skálholti og til tals hefur komið í Hólaprestakalli og í Hólastifti og innan prófastsdæmisins, Skagafjarðarprófastsdæmis, að ein sóknin, Rípursókn, færist úr Hólaprestakalli í annað prestakall þannig að það minnki einnig vegna aukins umfangs starfs vígslubiskupsins. En það að Hólastifti fái það sem það áður hafði --- líka Austurland, kannast ég ekki við. Hólastifti hefur verið Norðurland en Skálholtsstifti Suðurland, Austurland, Vesturland og Vestfirðir. Þannig að það er töluverður munur á milli.
